Мал эмнэлгийн практикт малыг шүрших, шумбуулан угаах гэсэн хоёр аргыг хэрэглэдэг. Мал ноосолсны дараа шимэгчид малын нимгэн арьстай, дулаан, чийг сайн хадгалагддаг нүдний ухархай, чихний уг, суга, цавь, хэвлий хонго, сагагт нуугдмал байдалд шилждэг. Энэ байдалд шилжснийг эрүүл болсон мэтээр ташаа ойлгож угаалга хийлгэхгүй байх нь мал сүргийн эдийн засгийн ашиг шимийг бууруулах үндэс болдог. Хөх ширх, шар ширх, шалз, хачиг, хамуу зэрэг шимэгч нь нийт мал сүргийн багахан хувьд тохиолддог ч урьдчилан сэргийлэх арга хэмжээ авахгүй, тоохгүй өнгөрвөл мал давжаарч, биеийн эсэргүүцлийг сулруулах, эрсдэл даах чадварыг бууруулж, улмаар түүхий эдийн гарц, чанарт сөргөөр нөлөөлдөг бөгөөд шимэгчтэх өвчнөөс урьдчилан сэргийлэх угаалгын арга хэмжээнд малаа тогтмол хамруулах нь хамгийн тохиромжтой, сонгомол арга юм. Мөн малаа угаалгад хамруулсны дараа хэвтэр бууцад халдваргүйжүүлэлт хийлгэх нэн шаардлагатай. Малыг технологит хугацаанд нь угаалгад тогтмол хамруулснаар:
– Эрүүл мэндийн байдал сайжирдаг: Мал угаалгаар арьс, үсийг цэвэрлэн, өвчнөөс урьдчилан сэргийлнэ.
– Үржил шим нэмэгддэг: Цэвэрхэн, эрүүл мэндтэй малын үржил шим илүү сайжирдаг.
– Чанар сайтай бүтээгдэхүүн гардаг: Цэвэрхэн арьс, үс нь илүү чанартай ноос, ноолуур, арьс, шир гаргахад тусалдаг.
– Хор хөнөөлт шавьжаас хамгаалдаг: Шавьж, паразитуудыг арьсан дээрээс нь арилгаж, хор хөнөөлөөс хамгаалдаг.
– Малын үнэ цэнэ өсдөг: Цэвэрхэн, арчилгаа сайтай малын зах зээл дээрх үнэ цэнэ нэмэгддэг.
ИЙМД МАЛЧИД, МАЛ БҮХИЙ ИРГЭД ТА БҮХЭН:
– Орон нутгийн мал эмнэлгийн үйлчилгээний нэгжийн тогтоосон хугацаанд малаа бэлэн байлгах.
– Мал угаах үед малын эмчийн зааварчилгаа, зөвлөмжийг даган, Монгол улсын эмийн бүртгэлд бүртгэгдсэн эмийн бодисоор технологийн дагуу бүх малыг угаалгад хамруулах
– Малын угаалгын үйлчилгээний хөлсийг малчин, мал бүхий этгээд хариуцах / Мал, амьтны эрүүл мэндийн тухай хууль/.